Accionista de Yahoo! pide un recuentu de votos
Ún de los mayores y más críticos accionista de Yahoo!, Capital Research Global Investors, pidió una investigación sobro la votación de la xunta d'accionistes de la empresa de la selmana pasada, poniendo en cuestión el fuerte sofitu que llogró'l conseyeru delegáu Jerry Yang.
Yang lleva meses baxo presión por cuenta de les negociaciones fallíes pa vender la empresa a Microsoft y a les duldes sobro'l so lideralgu, pero la votación del vienres pasáu suxería que los vientos taben camudando al so favor.
Les noticies de duldes sobro la votación apaecieron primero nel blogue D: All Things Digital, refiriéndose a Capital Research Global Investors, el grupu d'inversión dirixíu por Gordon Crawford, que s'oponía a Yang con más fuerza qu'el so fondu hermanu, Capital World Investors, según les fontes citaes pol blogue.
Yang recibió un sofitu del 85,4 por cientu nos resultaos anunciaos el vienres, col restu de los votos reteníos en protesta.
Los inversores que tienen casi'l 76 por cientu de los 1.380 millones d'acciones de Yahoo! ufiertaron un sólidu sofitu a los nueve miembros del conseyu, con un 77,9 por cientu de votos pal menos votáu Arthur Kern, un veteranu del conseyu.
"Sosprendímonos del peraltu númberu de votos a favor de Jerry Yang", comentar l'analista de Sanford C. Bernstein, Jeffrey Lindsay. "En concencia los resultaos finales paecíen bien distintos de les encuestes a cuerpu d'urna".
Yahoo! dixo nun comunicáu que nun yera responsable de nengún erru cometíu nel procesu de votación.
"La inspectora independiente d'elecciones certificó los resultaos de la elección y Yahoo! anunció apropiadamente esos resultaos", indicó la empresa nun comunicáu per corréu electrónicu, nel que dexó abierta la posibilidá de que dalgún intermediariu cometiera un erru.
Crawford, que'l so grupu d'inversión tenía'l 6,2 por cientu de Yahoo! a primeros de xunu, dixo en mayu tar "desaxeradamente enoxáu" con Yang pola rotura de les conversaciones con Microsoft. Capital World Investors tenía'l 9,8 por cientu de les acciones de la empresa, según documentos recientes de regulación.
Un voceru de Capital Group indicó que'l fondu dirixíu por Crawford consultara a Broadridge Financial Solutions, un intermediariu de servicios financieros.
Sicasí l'analista de Canaccord Adams Colin Gillis, indicó que yera improbable qu'un resultáu daqué más baxu debilitara la posición de Yang, que paez segura nun siendo que se produzan dificultaes financieres.
Fonte: Noticiascadadia
