Stallman califica la tecnoloxía 'cloud computing' de trampa pa les persones usuaries

El Fundador de Free Software Foundation y creador del sistema operativu GNU, Richard Stallman, calificó de “trampa pa les persones usuaries” a ún de los enclinos de moda na actualidá: El cloud computing, qu'implica dexar d'executar los programes a nivel local pa treslladar les xeres de cálculu a xigantescos parques de servidores en compañíes como Google, Microsoft y Amazon como asocede por casu con paquetes ofimáticos en llínea o programes de corréu electrónicu.

Pa l'espertu, defensor incansable del software llibre y abiertu, esti tipu de software obliga a les persones usuaries a comprometese con sistemes zarraos, qu'al ser propiedá de provisores comerciales, “atrápen-yos”. Considera que la so llucha nun terminó namás por cuenta de que los programes agora tán siendo treslladaos a Internet y califica'l cloud computing de trampa qu'ensobia a la xente a un modelo nel que los precios nel segmentu final son descomanadamente altos.

Según Stallman, “una de les razones poles que nun se debe usar aplicaciones web pa les tos xeres de tecnoloxíes de la información, ye que pierdes el control. L'usuariu tien de tar en condiciones de realizar les sos propies xeres nel so propiu ordenador, nun programa amigu de la llibertá”. “Si uses un programa propiedá d'un provisor, o'l servidor web d'otra persona, entós quedes indefensu/a”, sentenció.

Fonte: Open Source World Conference