La FSF recibe 10.000 dólares pa impulsar la so llista de máximes prioridaes

Russell Ossendryver, propietariu de la empresa Worldlabel.com Inc, donó a la Free Software Foundation (FSF, Fundación pa'l Software Libre) 10.000 dólares pa promocionar los proyectos de la so llista de máximes prioridaes. Esa llista recueye tolos trabayos que, a xuiciu de la organización encabezada por Richard Stallman, ye necesariu acabar antes pa beneficiu de la comunidá del software llibre.

Según Joshua Gai, responsable de campañes de la Fundación, «La FSF ta preguntando a les persones usuaries polos problemes qu'afecten al software llibre pa da-yos una prioridá más alta» en relación col funcionamientu d'esta llista. Pela so parte, Ossendryver comentó qu'«hai munches amenaces que trai'l software propietariu y quiero contribuyir a un proyectu que puede ayudar a solucionar estos problemes. Toi deseyando trabayar cola FSF p'atopar formes creatives de promover esta causa».

Na llista de máxima prioridá de la FSF hai proyectos como Gnash, una versión llibre del Flash Player propiedá d'Adobe; una alternativa llibre a Google Earth; el sistema operativu llibre gNewSense o una ferramienta llibre pa sustituyir a Skype, ente otros.

Fonte: Open Source World Conference